BLOGGER TEMPLATES AND TWITTER BACKGROUNDS

الأحد، 27 يونيو 2010

جيل عفرتو


عايز أعرفكم عليا وعلى اصحابي
علشان تفهمونا كويس
وتعرفوا بنحب نعمل إيه وبنكره إيه

جبت لكم شوية من اصدقائي تتعرفوا عليهم
وأكيد ها تفهموا الجنس البشري الصغير اللي زينا

إسلام صاحبي
بيحب : الكورة
بيكره : المذاكرة
نوع الموسيقى اللي بيفضله : مش بيسمع موسيقى
رأي مامته وباباه فيه : مؤدب واخته وأخوه برضه شايفينه مؤدب
نوع السيارة اللي بيحبها: ماتسوبيشي
بيحب اللون : الأسود
الكارتون المفضل : سلاحف النينجا
الفيلم المفضل : الشبح


علي صاحبي
بيحب الكورة
بيكره القلقاس
بيسمع هيب هوب
طبعا باباه ومامته برضه شايفينه مؤدب
وأخته برضه شيفاه مؤدب
بيحب العربية ال BMW
بيحب اللون البرتقالي
الكارتون المفضل توم وجيري
وده كلنا بنحبه أصلا ومحدش بيمل منه :)
بيحب فيلم سو

صاحبي عمرو
بيحب الكورة
كلنا بنحب الكورة
وبيكره المذاكرة
كلنا بنكره المذاكرة
وبيسمع بوب
وكذلك رأي أهله فيه إنه مؤدب
"رأي الأهل تم بالتليفون والله"
بيحب العربيات ال BMW
وبيحب اللون الأخضر
وبيتفرج على بن تن
وفيلمه المفضل عسل إسود
وأغنيته المفضلة بركوتا بتاعة أبو الليييييييييييف


نيجي بقى لصاحبكم وصاحب المدونة وعم الجيل عفرتو
بحب الكورة والمصارعة الحرة
من نجوم المصارعة ري ماستريو هو المفضل
اغنيتي المفضلة أغنية يا واحشني بتاعة تامر حسني
بحب تامر حسني علشان هو بيقول اغاني رومانسية
مش علشان البدلة والدقن اللي بيربيها
طبعا رأي الأهل فيا طبعا إنتو عارفين عفريت عفريت عفريت
مش أي أي ولا زي زي ولا أي شاب يتقال له عفرتو
بحب اللون الأحمر جدا وفي كل شيء
وبحب العربية الشيفورليه اللومينا بتاعة خالو
هي دي الجامدة جدا اللي عاوز واحدة زيها
مسلسلي المفضل سبايدرمان
وفلمي المفضل المذهل الخطير برضه سبايدرمان 3
كل شيء على سبايدر مان بجيبه
مخدة
لعبة
سي دي بتاع بلاي استيشن
قصة
ساعة
اي شيء سبايدرمان يبقى حبيبي

جيلنا أحسن جيل احنا تعليمنا أحسن من الكبار علشان الكون بيتحسن في كل جيل وبنستكشف حاجات أكتر وبندرسها

الاثنين، 14 يونيو 2010

قدرات عفرتو الخارقة


نفسي أصمم ساعة بس مش بمعنى ساعة
جواها أشكال غريبة
لما أدورها كل شكل يجيب صنف من المخلوقات العجيبة
ادوس على واحد منهم
اتحول لشكله
ويبقى عندي قدرته


الأشكال دي يكون لها قوة عجيبة
كل شكل له قوته
أقدر أستنسخ من الشكل ده كتير

مثلا شكل واحد أنا سميته الإستنساخي
وصفه: ليه ايد كبيرة شوية بيطير
ويقدر يطول إيده ولو لمس أي حاجة تيجي لإيده
وعنده عين واحدة بتطلع أكتوبلازم
حاجة كده بتخلي اي مخلوق شرير يقف ويلزق ومش يتحرك

مثلا وأنا على الشاطيء وحدي ها أعمل إيه؟
أستخدم الساعة وأستخدم المخلوق الإستنساخي حتى لا أكون وحيدا
تفتكروا هو أنا كده عجيب شويتين؟!

الخميس، 10 يونيو 2010

بوست تعريفي


أسمي أحمد
صفتي عفرتو
بابا سماني وزيز علشان من يوم ما أتولدت بززززززززن متواصل بلا توقف
ماما بتحبني أكتر من أي إنسان على وجه الأرض
صفاتي أقرب لمامتي وعلشان كده بيننا إتصال في كل شيء
عمري عشر سنوات
وبلوجر قال لازم أبقى 13
قلت له ولا تزعل نفسك
نكتبها 13 وأنتوا تعرفوا أنهم عشرة
مش عارف أنا عامل مدونة ليه
يمكن علشان مامتي وأختي عندهم مدونات
ويمكن علشان أشارككم في الحاجات اللي بحبها
يمكن علشان حاجة غريبة
مش عارف
ها أجرب وأشوف هل ها أحب التدوين ولا لأ
أنا أصلا دايما مستعجل
ومش عارف الكتابة ها أحبها ولا لأ