BLOGGER TEMPLATES AND TWITTER BACKGROUNDS

الخميس، 10 يونيو 2010

بوست تعريفي


أسمي أحمد
صفتي عفرتو
بابا سماني وزيز علشان من يوم ما أتولدت بززززززززن متواصل بلا توقف
ماما بتحبني أكتر من أي إنسان على وجه الأرض
صفاتي أقرب لمامتي وعلشان كده بيننا إتصال في كل شيء
عمري عشر سنوات
وبلوجر قال لازم أبقى 13
قلت له ولا تزعل نفسك
نكتبها 13 وأنتوا تعرفوا أنهم عشرة
مش عارف أنا عامل مدونة ليه
يمكن علشان مامتي وأختي عندهم مدونات
ويمكن علشان أشارككم في الحاجات اللي بحبها
يمكن علشان حاجة غريبة
مش عارف
ها أجرب وأشوف هل ها أحب التدوين ولا لأ
أنا أصلا دايما مستعجل
ومش عارف الكتابة ها أحبها ولا لأ

26 التعليقات:

عفرتو يقول...

الف الف مبروك يا وزيز يا لذيذ
ربنايخليك للامة والمجتمع والشعب
بحبك موووووووووت



مهره

ستيتة يقول...

السيد الأستاذ الدكتور رئيس القسم عفرتو
مبروك المدونة
وربنا يجعلها دايما في ميزان حسناتك
بمعنى يا عفرتو لازم تكتب فيها اللي يرضي ربنا
ليه؟
علشان الواحد لما يموت بيسيب كلماته للناس بعده
فدائما كلما قرأ لك حد كلمة طيبة تاخد انت حسنات كتير كتير كتير وتبقى عملت حاجة تدخلك الجنة

وعليه يا سيد الرجالة
خلي دايما كلمتك طريق من طرق انك تكون مسلم صالح
ممكن دي تكون أول خطوة

تحياتي وبوسة وحضن ويالا علشان ماما تعمل الغدا
ممممممممممممممممممممممممممممؤ

فاتيما يقول...

الف مبروك يا عفروتوووووو

نورت التدوين يا حبيبى
يا بن الغالية
و الغالية هيا ماما حبيبتنا كلنا
و مانوسة كمان
و اخيرا انتا شرفت و بقيت وسطنا

احكى يا حبيبى و قول كل اللى نفسك فيه و احنا هنسمعك و نحكى معاك

الف مبروك
انا هحط مدونتك عند يوسف ابنى
هوه كمان عنده 11 سنة و البلوجر مكلمشى قوى و عمل هوليلاً

اصل المهم هتكتب ايه و تعمل ايه
و اصلا ماما حاكية عنك حكاياااااات
بتقول انك راجل صغنن
يعنى السن مش مهم قوى
المهم الدماغ


لو ليك ف الرسم ابقى فرجنا برضو
انا اعز الناس الفنانة قوى
و لما يرجع يوسف
تبقوا تبعتوا لبعض العاب و حاجات

آه قبل ما انسى
مين الشاب الوسيم اللى مش لاقى قميص يلبسه اللى انتا حاطه عندك ف خلفية المدونة دا ؟!!!

اوعى يكون مصارعة حرة
و النوظام دا ؟
يا لهوتينى

طيييييييب

بوسيلى ماما
لو سمحت
و قول لمانوسة
ان شاء الله الامتحانات تطلع كويسة و ناجحة
و متفوقة بإذن الله

سلام يا هدنزة

عاشقه الرومانسيه يقول...

عفروتو حبيبى
معقول
مش مصدقه عينى
انا هاحط المدونه دى عندى حالا
وكل بوست هينزل هتلاقى تعليق عليه مني
هاتابعك هنا زى ماانا متابعه اخبارك من ماما ودايما باوسطها انى اطلب ايدك واتجوزك
كده بقى اقدر اخلى الموضوع مني ليك مباشرتا
واقدر اقولك بكل ثقه
تقبل تتجوزنى ياعفروتو؟؟؟؟
اوعى تقول لأ وتكسر قلبى انا غلبانه وبحبك والله
(:


مبروك المدونه ياحبيبى

adel يقول...

انا قلت برضه الاسم مش غريب

سيبك انت فيفا ايه اللي بتلعبها دي ؟؟
بتلعبي بلاي استشين ؟
جاي علي اللي يشيل ؟؟؟

--------------
كارتون ايه ده اللي بتحبه :)
قولي اسم اي فيلم و اجيبهولك هدية


سلامي للعائلة التدوينية :):)

جارة القمر يقول...

الف مبرووووك يا عفرتو باشا

وانا اقول بلوجر منور ليه ؟؟
ازيك عامل ايه ؟؟

انا هفضل قاعدة هنا على باب المدونة واستنى اللى هتكتبه مش تخلينى استنى كتير بقى اتفقنا ؟؟

القدر و انا يقول...

سعادة الوزير
مرحبا بك فى عالم التدوين
بس نعرف الاول وزير ايه؟؟؟؟؟؟؟؟
لو سألت الاستاذ شرفنطح (8 سنوات ونصف ) حيكون رايه تبقى وزير الدفاع عن حرية الابناء ( الاولاد ) وطلباتهم
شكلك يعرف يقنع الاهل كويس
شرفنطح يقدس حرية الراى وحرية التعبير فى مجلس الاسرة ولابد ان يحترم رايه
بس عاوزين وزارة لسيادتكم
وطبعا نقابة كمان
يارب افرح بابنى العام القادم وهو عامل مدونة يعبر فيها عن ما بداخله
اكتب يا احمد كل حاجة واى حاجة عن الموتسيكلات والسيارات
عن الافلام عن المدارس
ده حيساعد كل الامهات تفهم ولادها اكتر
وانا باشكرك مقدما سعادة الوزير

بوبو يقول...

يا اهلا يا اهلا بالناس الحلوة.. على فكرة يا سي عفروتو احنا عارفينك من قبل ما تعمل مدونة.. بصراحة ماما مش سايبة حكاية الا وحكتها عنك.. يا رب دايما تكون ولد صالح وتفرح قلبها وقلب بابا.. وبالنسبة لموضوع مستعجل دايما دا فمتقلقش.. بكرة يا استاذ عفروتو الحياة ومسؤولياتها يخلوك تبقى هادي ومتاني.. خصوصا انك راجل واحنا معندناش رجالة تبقى متسرعة.. الراجل عندنا مسؤول دايما عن ناس حواليه يبقى لازم يكون عاقل ويوزن الامور والكلام
شوف انا رغاية ازاي؟ اخر كلمة احب اقولهالك انك تكون مسلم صح لما دايما في حياتك تشوف ايه اللي ربنا والرسول بيحبوه وتعمله على اد متقدر وتكون فاهم ان الدين مش صلاة وصوم بس لكن كمان حب للناس وخدمة ومنفعة ليهم.. ربنا يباركلك ومستنيين ابداعاتك يا استاذ عفروتو

Haytham Alsayes يقول...

عفرتو باشا

منور ياستاذ عالم التدوين
ربنا يبارك فيك ونلاقيك كدة انسان محترم


متابعك علي طول ياحاج عفروتو

ومبروك المدونة

العلم نور يقول...

مدونة جميلة جدا .. وكلمات أجمل تحياتي لك يا عفريتو بيه

richardCatheart يقول...

عرفت الخبر قولت لازمن ولا بد اجى افقع زغروطه لان الناس اللى هنا كلهم هاى كلاس وماحدش يابنى هايزغرطلك

الف مبروك وربنا يجعلها فتحت oير عليك
يا مش مهندس عفرتو عقبال ماشوفك دكتور
الكترونيات وفضاء خارجى ومتسألنيش ازاى علشان دا اكبر حاجه عندى وادينى ودنك

لللللللللللللللللللللللللللللللولى


لا لا لا لا لا لا لا لا لا لا لا لا للىىىىىىىىىىىىىى

ربنا يفرح ست الستات بيك يارب
وان شاء الله مريهان وميرو يجو يزووووووووروك

GiGi world يقول...

ايه ده معقول بلوجر هيبقى فيه رجاله كده


يلا ياعم شوط زي ميسي وورينا الافكار والجنان

على فكره ياتوتو مامى بتقول انك عفروتو بجد
يلا بلوجر بيقولك عفرت علينا وطلع شغل الفاريت كله هنا


على فكره عايزه اكلمك زي ماتكون نونو
بس حساك عفريت وراجل بجد
على فكره بحب اللى زيك قوى البراءه مع الشخصيه الجميله
هتقول عرفت منين دى هقولك مفيش حاجه بتستخبى على بلوجر

بس سؤال ياعفروتو باشا ليه سيادتك عامل المدونه خلفيه سودا
هما الرجاله القمر اللى زيك يشوفوا العالم كده

فتحها ياابنى ربنا يفتح علينا وعليك


بقولك ايه ينفع اديلك بوسه ولاحرام
ماهو انت صغير بس زي ماقلتلك راجل مستنيه منه كتيييييييييييييييييييير قوى ياتوتو
بوسه وماتقولش لحد

فاتيما يقول...

صباح الخير يا حبيبى
ازيك

انا جاية اصبح عليك
و اشوف اخبارك ايه ؟؟

طبعا انتا اكيد
عندك حالة زهق رهيبة
بسبب ان الامتحانات خلصت صحيح
بس لسه البيت كله ملخبط عشان امتحانات مانوسة ..صح؟؟

طب قولى احكيلى
بتقضى وقتك ازاى ؟؟

يعنى بتلعب على الكمبيوتر
كام ساعة كدا ؟؟
و العاب ايه اللى بتحبها

تعرف يوسف ابنى
كان بيحب يوجى و سباق العربيات
و الفيفا



بمناسبة الكورة
بتتفرج على ماتشات كاس العالم ؟؟


انتا اهلاوى
و لا زملكاوى يا عفرتو
اوعى تكون زملكاوى هزعل قوى


مش قوى يعنى
دنا بهزر معاك

اختار الفريق اللى يعجبك
يا واد و لا يهمك
المهم متبقاش متعصب
و انتا بتشجعه
يعنى تحبه آه و جدا كمان
بس متقولش حاجة
على الفريق المنافس و كدا


و طبعا بتتفرج على قنوات الكارتون
بتحب الmbc3 و لا نيكلودين اكتر
و لا الجزيرة و لا إيه؟؟



استنى اهم سؤال بقى
بصفتى امينة مكتبة
و شغلتى الكتب

ليك ف القراية
و لا مبتحبهاش يا شقاوة ؟؟


طب آخر حاجة قريتها ايه؟؟

ممكن تبقى تكتبلنا عنها

يعنى لو قريت قصة
او حاجة عجبتك
ما تجرب تكتبلنا عنها


و زى ما عجبتك
ان شاء الله هتعجبنا اكيد



انتا عارف بق ى
ان ممكن نكون قريناها
زمان و لا حاجة و انتا تفكرنا بيها و ننبسط كلنا
و كاننا قريناها سوا


هى دى الفكرة الحلوة من التدوين
اننا ننقل افكارنا لبعض
و نستفيد من بعض


و دى حاجة من الحاجات
اللى لو عملتها تبقى مسلم صح
يا حبيبى

انك تحاول تنفع بنى آدم تانى غيرك باللى تعرفه ..
مش مهم البنى آدم دا
يكون اقرب حد ليك
و لا حد متعرفوش خالص ..


المهم انك بتنفع الناس عشان ربنا خلقنا و ادانا كوكب الأرض دا نبقى اصحابه عشان كدا ..

عشان نعمره و نكبره
و نخليه جميل و دا بيحصل فى ابسط حاجة تتخيلها ..
يعنى كفاية ترسم رسمة حلوة و لا تكتب معلومة او حدوتة جميلة
فتفيدنا و تبسطنا و تبقى عملت حاجة كويسة جدااا و خير


انا رغيت كتيييييير قوى
بس حاسة كأنى بتكلم
مع يوسف تمام
و خلى بالك من نفسك بقى


صباح الخير يا حبيبى

عفرتو يقول...

مهرة
شكرا قوي
تعليق عسل ويزووووووول :)

عفرتو يقول...

ربنا ىكرمك الاهى ربنا ىخلى الجولى

عفرتو يقول...

فاتيما
الله يخليكي وربنا يرجع لك يوسف بالسلامة وبإذن الله ها اقابله وننبسط ونلعب
حاضر ها احكي واعبر عن كل حاجة
وانا ها احط مدونة يوسف عندي ان شاء الله

انا مبفهمش في الرسم قوي انا بحب الموسيقى

الي في خلفية المدونة ده مصارع عالمي اوعي يا طنط ما تكونيش سمعتي عنه
ده اسمه جون سينا
شكرا ان حضرتك حطيتي مدونتي فوق وربنا يخليكي
ومع السكر "بدل الشكر" :)

عفرتو يقول...

عاشقة الرومانسية

أقبل ان شاء الله
استني لما اخلص الجامعة بقى
شكرا ومع تحيات عفرتو الوسيم :)

عفرتو يقول...

عادل

شكرا يا معلم
عاوز فيلم توايلايت
سبايدر مان تو وثري
فانتستيك فور
وسو فايف وسيكس

ها نتقابل قريب

عفرتو يقول...

جارة القمر

الله يخليكي وان شاء الله ها انزل بوست على طول ويارب يعجبك

عفرتو يقول...

طنط القدر وانا
انا اسمي وزيز يا طنط مش وزير :)
علشان وانا نونو كنت بزن على طول

طبعا انا بقدس حرية الرأي أمال متسمي عفرتو ليه
اوعي تكوني فاكراه اسم الشهرة ده انا مخصصه للحاجات دي بالذات
اشكرك وسلمي لي على شرفنطح

عفرتو يقول...

طنط بوبو

ها اجتهد ان شاء الله واحاول مش ابقى مستعجل
شكرا يا طنط على الكلام الجميل ده
انتي مش رغاية حضرتك كلامك عقلني وخلاني افهم الحياة ومبقاش مستعجل على طول:)

عفرتو يقول...

هيثم السايس

شكرا شكرا شكرا:)

عفرتو يقول...

ام الخلود

شكرا على الكلام الجميل ده وربنا يخليكي

عفرتو يقول...

طنط ريتشارد

ميريهان وميرو عندهم كام سنة؟
وشكرا على الزغروطة الحلوة

عفرتو يقول...

جيجي

اولا انا مش توتو انا سيد الرجالة :)
ثانيا حاضر ها اعفرت ان شاء الله

شكرا

البوسة حرام يا جيجي انا مش توتو خااااااالص
جواز مين مش عارف ايه باطل:)

عفرتو يقول...

فاتيما

مساء الخير يا طنط
انا فرحان قوي ان حضرتك بتتكلمي معايا
كأن أنا ابنك

طبعا زهقان جدا قوي خالص

قاعد ورايا شغل كتير جدا اقول لك شوية
كل يوم بعمل نفس الحاجة
الشغل فاضي فاضي فاضي
شفتي يا طنط بكون مرهق ازاي من كتر التعب وبصرف على ولادي ومراتي مزهقاني :)

بحب ألعب على الكمبيوتر
بحب ألعاب القتال ولعب السيارات والدراجات
ومهوس بألعاب سبايدر مان بكل انواعه

بتفرج على الماتشات
انا اهلاوي
الأهلي زيه مفيش


انا بحب النيكولودين اكتر وبتفرج على كارتون سبونج بوب سكوير بانتس
"لقد أصبت بواوا":(

شكرا كتير جدا يا طنط انتي عسولة وبتفرحيني زي أبنك
بوسة